Azaroaren 20an, larunbata, APNABI Autismo Bizkaiak bere Gela presentzialak berreskuratuko ditu COVID-19aren pandemiak markatutako aldiaren ondoren. Topaketa hauek, bereziki bazkide diren familiei zuzendutakoak, autismoaren espektroaren nahasmendua duten pertsonei eragiten dieten gaiei eta egoerei buruzko prestakuntza hobetzea dute helburu, beren bizitzako etapa ezberdinetan zehar, eta topaketarako eta esperientziak partekatzeko uneak errazten dituzte.
Oraingo honetan, AENdun pertsonek komunikazio-teknologia berriak modu seguruan eta arduratsuan erabiltzeko gakoak landuko dira. Horretarako, elkarteak Rosa Pérez Gaptaingo hezkuntza digitaleko zuzendaria izango du. Gainera, Iban Huarte APNABI LANeko zuzendari eta APNABIko Datuak Babesteko ordezkariak parte hartuko du, eta erakundeak digitalizazio segururantz jarraitzen dituen ildoak azalduko ditu.
Ohi bezala, hitzaldiaren ondoren profesionalei galderak egiteko eta esperientziak partekatzeko txanda irekiko da. Gainera, mokadua zerbitzatuko da APNABI LAN, elkartearen arlo soziolaboralaren Sukaldaritza & Catering proiektuaren eskutik.
Partehartzea
Hitzordua azaroaren 20an izango da, larunbata, 11: 00etatik aurrera Bizkaia Aretoan (Abandoibarra, 3). Parte hartzeko, ezinbestekoa izango da APNABIren familia bazkidea izatea eta aldez aurretik izena ematea esteka honetan eskuragarri dagoen formularioan. Plazak mugatuak direnez, izen-ematea zabalik egongo da aretoaren edukiera bete arte.
Aipatzekoa da hitzaldia bideoz grabatuko dela eta, ondoren, elkartearen Youtubeko kanalaren bidez eskainiko dela, non beste hitzaldi eta jardunaldi batzuk eskuragarri dauden.