Lankidetzari esker, laguntza espezializatuak garatu ahal izango dira Lanbide Heziketa egiten ari diren eta autismoa duten 38 pertsonarentzat.
APNABI Autismo Bizkaiak eta Rural Kutxaren Gizarte Ekintzak lankidetza-hitzarmen bat sinatu dute “Talentua eta autismoa: LH duala benetako laneratzerantz eraldatzen” proiektua bultzatzeko. Egitasmo pilotu hau Eusko Jaurlaritzako Lanbide Heziketako Sailburuordetzarekin adostu da, eta ikasle autisten inklusioa eta arrakasta profesionala bultzatzea du helburu, Euskadiko Lanbide Heziketako sisteman.
Rural Kutxaren Gizarte Ekintzaren laguntzari esker, APNABIk Prestakuntza Dualari Laguntzeko Programa garatu ahal izango du. Jarduera hori funtsezkoa da proiektuaren barruan diseinatutako esku-hartze eredua osatzeko eta LHko ikasketak egiten ari diren autismoa duten pertsonek enplegua lortzeko dituzten aukerak indartzeko.
Egitasmoa autismoa duten eta prestakuntza duala egiteko fasean dauden 38 ikasleri zuzenduta dago. Helburua hezkuntza-ingurunearen eta lan-esperientziaren arteko trantsizioa parte-hartzaile bakoitzaren ikaskuntza, ongizatea eta arrakasta errazteko beharrezkoak diren laguntzekin egiten dela bermatzea da.
Horretarako, programak funtsezko hiru jarduera-ildo jasotzen ditu LH dualean: laguntza metodologikoa, autismoa duten ikasleei zuzenean laguntzea enpresan sartzeko prozesuan, eta enpresa parte-hartzaileen tutoreei laguntzea, lan-ingurune irisgarriagoak eta inklusiboagoak erraztuko dituzten tresnak eta orientazioa emanez.
Euskadi osora transferitu daitekeen eredua
Laguntzak APNABIk zabalduko ditu Bizkaian, eta Arabara eta Gipuzkoara hedatuko dira lurralde bakoitzeko elkarteekin batera, Euskadi osorako eredu transferigarria eta jasangarria sortzeko.
Lankidetza hori bi erakundeek kalteberatasun handieneko egoeran dauden pertsonentzako aukerak sortzeko eta gizarte inklusiboagoa eraikitzeko duten konpromiso partekatuaren barruan kokatzen da, non pertsona bakoitzaren talentua baldintza berdinetan garatu ahal izango baita.
Horretarako, Rural Kutxaren Gizarte Ekintzak proiektu hori garatzen lagunduko du, Hezkuntza eta Sustapen Funtsaren bidez bultzatzen dituen helburu sozialekin eta aukerak sustatzeko helburuekin bat etorriz.