Autismoa duten 12 eta 16 urte bitarteko pertsonei zuzenduta dago, Lehen Hezkuntza edo DBH ikastetxe publikoetan edo itunduetan egiten dutenei, eta bi saiotan egingo da (ekainaren 3an eta 17an)
APNABI Autismo Bizkaiak “Konektatu eta jolastu” bideojokoen tailerra eskainiko du, aisialdi digitala eta ikaskuntza uztartzen dituen proposamena, gizarte-trebetasunak, lankidetza eta sormena sustatzeko. Tailerra ekainaren 3an eta 17an izango da, 16:00etatik 18:00etara, Deustun.
Tailer honetan autismoa duten 12 eta 16 urte bitarteko gazteek parte har dezakete, baldin eta Lehen Hezkuntza edo DBH ikastetxe publiko edo itunduren batean ikasten ari badira.
Ekimena Autismo Españak bultzatutako eta Hezkuntza, Lanbide Heziketa eta Kirol Ministerioak finantzatutako programa baten barruan kokatzen da, tresna digital eskuragarrien bidez ikaskuntzarako espazio inklusiboak sortzeko helburuarekin.
Ikaskuntza eta elkarlaneko jolasa
Saioetan, parte-hartzaileek Eaglercraftekin lan egingo dute, Minecraft bideojoko ezagunaren bertsio batekin, ingurune seguru eta egituratuetan ikasteko dinamikak garatzea ahalbidetzen duena.
Lantaldearen ardatza taldekako elkarlaneko jokoa izango da. Bertan, pertsonaien, eraikuntzen eta agertokien eraikuntza bateratua bezalako erronkei helduko zaie, parkour erako zirkuituak barne, komunikazioa, talde-lana eta ingurune digitaletako sormena indartuz.
Izen ematea zabalik maiatzaren 10era arte
Interesa dutenek maiatzaren 10era arte eman dezakete izena. Ondoren, APNABIko taldea harremanetan jarriko da parte-hartzea baieztatzeko eta informazio gehigarria emateko.
Informazio gehiago nahi izanez gero, APNABIko aisialdi eta denbora libreko taldearekin harremanetan jar zaitezke, aisialdia@apnabi.eus helbidera idatziz edo 94 447 14 17 telefonora deituz, astelehenetik ostiralera 9:00etatik 16:00etara.