APNABI Autismo Bizkaiak turismo irisgarrian erreferente gisa duen papera indartu du aste honetan, familien eta autista bidaiarien beharrei arreta eskaintzera bideratutako webinar bat antolatuz, BasqueTour Turismoaren Euskal Agentziarekin batera.
Egitasmoak arreta jarri zuen Euskadik aurrera egin behar duela familia mota guztiak erakartzeko eta hartzeko prestatutako helmuga gisa, familia-aniztasuna turismo-sektoreak ere aintzat hartu behar duen errealitate gisa ulertuta.
Ostegun honetan APNABIren bulegoetatik telematikoki egindako saioan, lehen pertsonako testigantzak eta oporretako eta hoteletako eskaintzaren irisgarritasunarekin eta lagunkoitasunarekin lotutako esperientzia profesionalak bildu ziren.
Ordubetean zehar, APNABIk irisgarritasun kognitiboaren eta turismo inklusiboaren arloan metatutako ezagutza eta esperientzia partekatu zituen, eta, horrela, eremu horretan erreferentziazko agente gisa duen posizioa sendotu zuen.
ErrazTEA, abangoardian, irisgarritasun turistikoan ere
Hasiera ekitaldia Noemi Tetua APNABIko hezkuntza arloko zuzendariak egin zuen eta APNABIren lana laburki aurkeztu zuen. Ondoren, Begoña Álvarezek, ama gisa eta elkarteko presidenteorde gisa, familia askok bidaiatzerakoan dituzten kezkak eta beharrak jorratu zituen: leku seguru eta ulergarriak bilatzetik hasi eta segurtasunik eza sortzen duten edo bidaia bat aukeratzea baldintzatzen duten faktoreetaraino.
Ikuspegi profesionala Noemi Tetuaren eskutik iritsi zen. Noemi Tetuak azpimarratu zuen garrantzitsua dela espazio turistikoek eta hotelek irisgarritasun- eta lagunkoitasun-irizpideak izatea, pertsona guztientzako esperientzia egokiak bermatzeko.
Bestalde, Álvaro Fernández ErrazTEAko (APNABIren irisgarritasun kognitiboko zerbitzua) pertsona autista eta profesionalak turismo irisgarriari buruzko bere esperientzia pertsonal eta profesionala partekatu zuen, leku batetik zer espero duen, zer elementu baloratzen dituen eta oraindik ere badirauten oztopoak zeintzuk diren zehaztuz.
Topaketari amaiera emateko, bertaratutakoen artean galderak egiteko eta esperientziak trukatzeko une bat egon zen, irisgarritasun turistikoa balio estrategiko eta zeharkako gisa ulertu behar delako ideia indartuz.
2028ko Autism-Europe Nazioarteko Kongresua, ekitaldi inklusiboa
Webinar horren ospakizuna, gainera, APNABIk irisgarritasunaren arloan gero eta ibilbide luzeagoa egitearen barruan kokatzen da, eta lan horrek garrantzi berezia hartuko du 2028ko Autism-Europe Nazioarteko Kongresuari begira. Kongresua Bilbon egingo da, APNABI erakunde anfitrioia izanik.
Nazioarteko hitzordua aukera bat izango da Euskadin irisgarritasunaren, inklusioaren eta aniztasunarekiko arretaren inguruan garatutako ezagutza eta esperientzia proiektatzeko, baita funtsezko sektoreetan ere, hala nola turismoan.