APNABI Autismo Bizkaiaren AEN duten pertsonentzako lan- eta arreta-zentroek jarduera eta ekimen bereziak prestatzen ari dira datorren astelehenerako, martxoaren 8, Emakumeen Nazioarteko Egunerako. Jarduera hauekin, emakumeen eta gizonen arteko berdintasuna aldarrikatu eta landu egin nahi da.
Irakurketa eta hausnarketa
Eguneko Arretarako Zentroetan (EAZ), historian eta egungo gizartean garrantzia duten emakumeei buruzko informazioa bilatzeko jarduera bat landuko dute, beren lanari, ekarpenei eta ikuspenari buruz gogoeta egiteko. Gainera, genero-berdintasunari buruzko Plena Inclusion-en gida bat dute, irakurketa-dinamiken bidez osatzeko.
Arrigorriagako taldea bideo batean ari da lanean, beste zentro batzuekin partekatuko duena, eta Sortun kamiseta pertsonalizatuak prestatzen ari dira.
Iralabarriko zentro bilbotarreko erabiltzaile eta profesionalek, berriz, “La Principita” ipuinaren emanaldia eskainiko dute, eta, bestalde, Garamendi EAZko taldeak hezkidetza-proiektu bati ekin dio berdintasuna lantzeko.
Aipatzekoa da APNABIren zentro okupazionalak dokumentu bat idatziko duela, berdintasun, errespetu, hizkuntza eta beste alderdi batzuei lotutako konpromisoa biltzen dituena, egunerokotasunean aurrera egiteko.
Aldamiz ikastetxeko ikasleak hainbat eskulan-tailerretan ari dira lanean, martxoaren 8a gai nagusi gisa izanda. Gainera, irakasle taldeak irakurketa-, ulermen- eta gogoeta-jarduera bat diseinatu du, pertsona guztien eskura jartzen duena eta hemen deskarga daitekeena.
Musukoak
Gainera, APNABIko Berdintasun Batzordeak arrosa-lila koloreko musukoak emango dizkie zentroei, profesionalek argazkiak atera eta irudiak parteka ditzaten, elkarteak emakumeen eta gizonen arteko berdintasunarekin duen konpromisoa erakusteko.
Aurten ere, APNABIk bat egin du egun horretarako Emakundek sustatutako kanpainarekin. “Nork zaintzen du? Jar dezagun agerian. Egin dezagun dagokiguna” lelopean, ekimenak zainketak ikusarazi, baloratu eta gizarte osoaren artean banatzeko deia egiten du.