APNABI Autismo Bizkaiak ostegun honetan, urriak 3, ospatu du San Ignazio kiroldegiaren inguruan (Bilbo) zentru arteko kirol jardunaldiaren edizio berri bat, Bilbao Kirolakekin lankidetzan.
Topaketa honek, bere 4. edizioan, autismoaren espektroko nahasmendua (AEN) duten 150 pertsona baino gehiago bildu ditu, 20 boluntario baino gehiagorekin, Bizkaiko Herri Kirolak federazioko, Bilbao Artizarrak futbol taldeko, Barrena Berri saskibaloi klubeko (Ortuella) eta Javi Conde atletismo egokituko klubeko (Basauri) kideekin, Iker Gordon palista profesionalarekin batera. Ekimen honen bidez eta bizitza osasuntsuaren aste guztietan, APNABIk desgaitasuna duten pertsonen artean bizimodu aktiboagoa eta osasungarriagoa izateko ohiturak sustatu nahi ditu.
馃摳 Ekitaldiaren argazki-albuma kontsulta dezakezu esteka honen bidez.
APNABIren eguneko arreta zentroetan, APNABI LAN zentro okupazionalean eta Aldamiz ikastetxeko autismoa duten pertsonak, profesionalen eta boluntarioen laguntzarekin, pala, futbola, atletismoa, saskibaloia eta herri kirolak egitera hurbildu dira. Elikadurari buruzko postu batek bazkari osasungarria eskaini du.
Gizarteratzeko bidea
Kirol ekitaldi honek amaiera eman dio elkarteko pertsonen artean bizitza osasuntsu eta aktiboa sustatzeko urteroko kanpainari. Bi astez, elikadurari buruzko hitzaldi irekiak eskaini dira familientzat, yogaren hastapenari buruzko jardunaldiak autismoa duten pertsonentzat, erlaxazio eta esperimentazio sentsorialeko saioak, besteak beste.
APNABIk, gainera, bere lan-ildoen artean sartzen du taldeko kirol-jarduera bultzatzea, plan pertsonalizatuen eta jarraipen profesionalaren bidez, bizitza aktiboagoa, aisia aberasgarria, gizarte-harremanak eta komunitatean sartzea bultzatuz.