APNABI Autismo Bizkaiaren Aldamiz Ikastetxeak #QTENTA lasterketaren 1. edizioaren dortsalak ilustratu ditu, Imanol Loizaga atletak azaroaren 28rako bultzatuta. Lankidetza-ekintza horren bidez, kirolariak APNABIren misioari lagundu nahi dio, autismoaren espektroaren nahasmena (AEN) duten pertsonak eta haien familiak ikusaraziz. Era berean, elkartearen lanari balioa ematea du helburu, AENdun pertsonen gizarteratzea bultzatze aldera bidezko gizarte solidariagoan.
“Korrika egitea bizia da” lemapean, elkarteko ikastetxeak marrazki-lehiaketa antolatu zuen ikasleen artean urrian. Eskolako neska-mutilek egin eta aukeratu zituzten azkenean lasterketako dortsaletan irudikatu diren 6 lanak. Ekimen horren bidez aniztasunaren balioa ere erakutsi nahi da. Bestalde, APNABI Laneko Azlan zentro okupazionalak diseinu grafikoko eta erreprografiako tailerrean sortu ditu dortsalak.
Ekintza berezia
Loizagak nabarmendu duenez, “ekimena ez da ohiko lasterketa, ekintza berezia da”, eta kirolaren garrantzia ere nabarmendu nahi du, “batez ere bizi ditugun garaietan, gure osasun fisikoa hobetzen baitu, baina baita burukoa eta emoziozkoa ere”. Izena ematen dutenek –imanol@loizagaprest.com helbidera mezu bat idatziz– ekimenaren dortsaletako bat jasoko dute etxean, munduko edozein lekutan. Horrekin nahi duten distantzia egin ahal izango dute, hilaren 28an, bakoitzak erabakitzen duen ingurunean, “hori bai, betiere leku bakoitzean indarrean dauden prebentzio- eta segurtasun-neurriak errespetatuz”. Izan ere, atletaren ekimena nazioartekoa da. Halaber, lasterketaren bultzatzaileak horren argazkiak eta bideoak sare sozialetan partekatzera bultzatu nahi ditu partehartzaileak, #KirolaBizitzaDa eta #qtenta traolak baliatuta.