APNABI Autismo Bizkaiaren Iralabarri Eguneko Arreta Zentroak (EAZ) jarduera artistiko aberasgarria garatu du Artegileak izenburupean 2024ko urria eta abendua bitartean. Proiektu honetan zentroko 12 pertsonek eta dinamizatzaile batek parte hartu dute, sorkuntza plastikoko prozesu kolektibo bat garatuz. Prozesu horren amaieran, erakusketa publiko bat egingo dute BBK-KUNAn, urtarrilaren 17an, ostirala, 17:00etan inauguratuko dena.
Astean bitan egin diren saioetan, parte-hartzaileek sinbologia eta esanahi pertsonalez betetako autoordezkaritzako proiektu batean lan egin dute. Irudiarekin lan egitea ardatz duten ariketa errazetatik, keinu txiki eta desio zehatzetatik sortutako konposizio handiei forma eman diete. Lan horietako askok formalizazio abstraktua duten arren, parte-hartzaile bakoitzak aukeratutako elementuetan sustraituta daude, eta erreferentzia figuratiboak eta objektiboak dituzte, sormen-prozesuari erantsita.
→ Proiektuaren argazki-laburpena ikus daiteke esteka honetan.
Jarduera Antespacio kultur elkarteak BBK Fundazioarekin elkarlanean antolatutako BBK Artegileak programaren parte da. Programa honen helburua da artisten eta komunitateen arteko lankidetzaren bidez sorkuntza artistikoa sustatzea, talde bakoitzaren interes eta beharretara egokituz.
Erakusketa
Erakusketa urtarrilaren 17an, ostirala, inauguratuko da 17:00etan BBK-KUNAn (Urazurrutia kalea, 3, Ibaiondo, 48003 Bilbo), eta otsailaren 17ra arte egongo da zabalik. Jendeak astelehenetik larunbatera 9:00etatik 21:00etara bisitatu ahal izango du, igandetan itxita dago eta. Iralabarri zentroko pertsonek komunitate osoa gonbidatzen dute erakusketa honetaz gozatzera, parte-hartzaileen ahaleginaren eta sormenaren eta inplikatutako erakundeen etengabeko babesaren ondorioz.