Gertu Kultura Bizkaia aurkeztu dute astelehen honetan, maiatzak 12, Bilboko BBK Aretoan. Egoera ahulean dauden pertsonei kulturarako sarbidea errazteko batzen diren programatzaile kulturalen sarea da, eta APNABI Autismo Bizkaia gizarte-erakundeen eskutik egingo dute.
BBK Banku Fundazioak ‘Kultura Inklusiboaren aldeko 2024-2030 Estrategiaren’ barruan, Bizkaiko Foru Aldundiko Euskara, Kultura eta Kirol Sailak eta Bizkaiko Foru Aldundiko Gizarte Ekintza Sailak eta Bilboko Udaleko Kultura eta Gobernantza Sailak babestutako irabazi-asmorik gabeko ekimen honek, kulturaren bidez pertsonen bizi-kalitatea hobetzea eta pertsona guztiei kulturara iristeko eskubidea bermatzen laguntzea du helburu.
Programari atxikitzen zaizkion kultura-ekipamenduek baztertuta geratzeko arriskuan dauden gizarte-erakundeen eta kolektiboen eskura jartzen dituzte beren ohiko programazioa eta ordutegiak, prezio sinbolikoan. Bestalde, gizarte-erakundeek eskubidea dute baliatu nahi dituzten kultura-esperientziak aukeratzeko, programazioaren edukieraren % 2 bermatzen baita gutxienez, eta taldeko sarrerak eskatzeko denbora ere bai.
Programazio hori guztia www.gertukultura.org diseinu-plataforman bertan argitaratzen da, premia desberdinak dituzten pertsonentzako irisgarritasun-irizpideen arabera diseinatuta. Plataformaren bidez, gizarte-erakundeek zuzenean partekatzen dizkiete kultura-erakundeei esperientziara joko duten pertsonen behar espezifikoak, esperientzia arrakastatsua izango dela eta irisgarritasun-kate osoa beteko dela bermatzeko.
Gertu Kulturak gizartea aldatzeko eragile gisa ulertzen du kultura, eta kulturaren eta gizartearen arteko topagune egonkorrak sustatzen ditu, elkarlaneko kultura eta erronka komunei aurre egiteko konpromiso kolektiboa bultzatuz.
Programak hiru ardatz nagusi ditu:
- Irisgarritasuna: Kulturara iristeko oztopoak identifikatzen eta murrizten ditu, kulturaguneekin, erakundeekin eta eragileekin lankidetzan arituz. Zaurgarritasun-egoeran dauden pertsonei aukera ematen die kultura-proposamen eskuragarriagoak egiteko, prezio murriztuekin, sartzeko lehentasunarekin eta arreta pertsonalizatuarekin.
- Sentsibilizazioa: Kanpainak, jardunaldiak eta topaketak garatzen ditu gizarte-aniztasuna eta kulturak bazterketa- eta kalteberatasun-egoeren aurrean duen zeregina ikusarazteko.
- Prestakuntza: Irisgarritasunari eta aniztasunari buruzko prestakuntza eta laguntza eskaintzen die kultura-arloko profesionalei, gizarte-erakundeekin batera, jardunbide inklusiboak eta bidezkoak sustatzeko. Horren adibide dira saio lasaiak edo goizekoak, eta beste irisgarritasun-neurri batzuk.
Gertu Kulturan parte-hartze dinamika erraza da. Gizarte-erakundeentzat doako tresna irisgarri gisa planteatzen da, eta bisita, sarrera edo kultura-esperientzia zuzenean erreserba dezakete www.gertukultura.org webgunean eskuragarri dagoen plataformaren bidez. Plataforma horretatik abiatuta, harreman zuzena ezartzen dute kultura-programatzaileekin. Programatzaile horiek prezio sozialean eskaintzen dute ohiko programazioa, eta jarduera bakoitzaren % 2ko edukiera gordetzen dute gutxienez. Plataforma horretan, gizarte-erakundeek erraz eta modu intuitiboan jakin ditzakete kultura-ekipamendu bakoitzaren irisgarritasun-neurriak, bilaketak egin ditzakete ordutegien, udalerrien eta arte-diziplinaren arabera, irakurketa errazeko ekipamenduen informazioa eskura dezakete eta kolektiboen beharrak azaldu.