Dagoeneko existitzen diren eta sortu berri diren zerbitzuak garatuko dira bertan, kalitatezko helduen bizitza autogestionatuaren erronkei erantzuteko.
APNABI Autismo Bizkaiak Kabi espazioa aurkezten du, autismoaren espektroaren nahasmendua (AEN) duten helduei bizitza autonomoagoa, autogestionatuagoa eta zentzudunagoa lortzeko bidean laguntzeko espazio berri eta berritzailea. Elkartearen arloek bertan garatuko dituzte pertsonei bizitza independente eta kalitatezkoa lortzeko bidean laguntzeko beharrezkoak diren laguntza eta baliabideak – lehendik daudenak edo sortu berriak –, prestakuntza, enplegua, etxebizitza, aisia edo osasun fisiko eta emozionala bezalako alderdiak jorratuz.
Kabi Sabino Aranaren egoitza handitu ondoren sortu zen, 250m2-ko eremu berri batean. Bertan bulegoak, eremu komunak, prestakuntza-gela bat, office bat eta sormenezko eta lankidetzazko bilera-gelak eskaintzen dira, baita balio anitzekoa eta etorkizuneko beharrei erantzuteko egokitzailea ere.
Helduaroa bizitzako aldirik luzeena da, eta, horregatik, garrantzi berezia hartzen du pertsona bakoitzak bere adinean dituen laguntzak eta aukerak izateak, komunitatean parte hartuz bere proiektu pertsonala garatzeko aukera izan dezan. Gaur egun, APNABIko AEN duten pertsonen % 49 adinez nagusiak dira.
Programak eta jarduerak
Elkarteko arloek helduentzako zerbitzuak zentralizatuko dituzte gune berri honetan, eta aukera berriak sortuko dituzte erantzuna eta baliabideak zabaltzeko.
ℹZerbitzu horiek diseinu-prozesuan daude, eta laster irekiko eta komunikatuko dira haietara sartzeko harremanetarako eta eskaerarako bideak.
Kabiren proposamenen artean honako hauek nabarmentzen dira:
- Informazio-, orientazio- eta aholkularitza-zerbitzua. Interesa duten pertsona eta senitarteko guztiei eskura dituzten laguntzei buruzko aholkularitza ematea, haien beharretara eta interesetara gehien egokitzen direnak eta garapen pertsonalera bideratuta daudenak kontuan hartuta.
- Ikastaroak eta prestakuntza. Askotariko proposamenak, AEN duten pertsonen garapen pertsonalera eta/edo lan-garapenera bideratuak. Halaber, tailerrak egingo dira profesionalentzat edo barne- edo kanpo-erakundeentzat, gizarteratzearen eremuan duten lan-jarduna hobetzeko.
- Lan-bitartekaritza eta enplegua. Lan-orientaziorako eta -bitartekaritzarako gunea, lan-egoeran dauden pertsonek lana bilatzeko prozesuetan parte hartzeko aukera izan dezaten.
- Coworkinga eta ekintzailetza. Hala nahi duten pertsonek profesionalen laguntza izan ahal izango dute autoenplegu-proiektua garatzeko, eta beste pertsona batzuekin lankidetzan aritu ahal izango dira proiektuak garatzeko.
- Bizitza independenterako entrenamendua. AEN duten pertsonei zuzendutako bizitza independenterako trebetasunei buruzko prestakuntza. Bere gaitasunak indartzera eta bizitza autonomoago baterako trebetasunak finkatzera eta/edo eskuratzera bideratua. Bospasei laguneko taldeak, saio teorikoak/praktikoak dituztenak. Urtean zehar 4 prestakuntza-talde garatzen dira.
- Boluntarioentzako bitartekaritza (Lankidetza – Bizkaia Gara). Gizartean parte hartzeko laguntza-programa, Bizkaia Gara-rekin lankidetzan. Prestakuntza-hitzaldiak proposatzen dira boluntariotzaren aukerak, ekintza komunitarioa eta parte hartzeko modu berriak ezagutzeko. Gure alde solidarioa aktibatzeko laguntza ere eskainiko da, gure kezka, gaitasun eta prestasunaren arabera.
- Aisia eta denbora librea. Aisia indibiduala eta partekatua kudeatzeko informazio-, orientazio- eta laguntza-zerbitzua, opor-proposamenen, plan ludikoen, kulturalen eta/edo kirol-planen bidez eta AEN duen pertsona bakoitzaren interesei erantzunez.
- Arreta psiko-emozionala. Banakako arreta psikologikoko kontsultak, helduarorako prozesuetan laguntzeko, pertsonei beren bizitzako egoerei eta erronkei aurre egiteko trebetasunak sendotuz laguntzeko edo trebetasunak, gaitasunak eta egoera emozionalak ebaluatzeko, besteak beste. Helduei balorazio diagnostikoa ere eskainiko zaie.