- AENa duen gaztea da, eta Asua bailaran dauden hegaztiei buruzko datuak ikusteko eta biltzeko garatzen ari diren proiektuaren buru da.
APNABI Autismo Bizkaiaren Derioko Eguneko Arretarako Zentroa (EAZ) Urdaibai Bird Centerrekin elkarlanean ari da hegaztiak behatzeko proiektu interesgarri batean. Zentroko pertsonek Jon de la Parte Quintasen bitartez garatzen dute ekimen hori. Bera autismoaren espektroko nahasmendua (AEN) duen gazteetako bat da, eta datuak ikusteaz, biltzeaz eta katalogatzeaz arduratzen da, Urdaibaiko erreserba naturaleko ornitologia-zentrora bidaltzeko.
Derioko EAZko profesionalak eta Jon de la Parte bera elkarrizketatu ditugu, eta xehetasun gehiago eman dizkigute lankidetza horretan nola lan egiten duten azaltzeko. Oso pozik daude ekimen honekin. Autismoa duten pertsonek APNABIn jasotzen duten laguntzaren pertsonalizazioaren adibide ona da.
Nola sortu zen Urdaibairekin lankidetzan aritzearen ideia hori?
Derio EAZ: Abiapuntua izan zen Joni entzutea hegaztiei buruz hitz egiten, gaiari buruz duen ezagutza, etab. Urdaibai Bird Centerrera bisita bat egitea proposatu genion, bere interesari erantzuteko, eta hortik sortu zen lankidetza.
Eta zertan datza?
Derio EAZ: Hegaztientzako janlekuak jarri ditugu. Horrela, gure inguruko hegaztien jarraipenean eta kontserbazioan laguntzen dugu. Bidaltzen zaien informazioarekin eta datuekin, Urdaibaiko taldeak hurbilen ditugun hegazti-populazioen osasun-egoera hobeto ezagutu dezake. Gure kasuan, janlekuak zentroaren kanpoko lursailean ditugun zuhaitzen eremuan jarri ziren. Eta hegaztiak hurbiletik ikusteko aukera ematen digute. Etorkizunerako ikuspegia duen proiektu bat da, neguero martxan jar daitekeena.
Zer informazio mota jasotzen duzue hegazti edo espezie bakoitzari buruz?
Jon de la Parte Quintas: Nik nire arreta pizten duten hegaztien bideoak grabatzen ditut, haien irudiak biltzen ditut. Informazio hori guztia biltzen ari naiz. Jangelan jaten duten hegaztien bideoak ere egiten ditut. Gero, aldiro-aldiro, Urdaibaira bidaltzen dut informazio hori, posta elektronikoz.
Nola ikusten dituzue hegaztiak? Egunero begiratzen diezue?
Jon de la Parte Quintas: Egunero ikusten ditut janlekuetan, janari gehiago jarri behar den ikustera noanean. Begiratu eta entzun egiten ditut. Erdiko lorategian ikus ditzakedan hegaztiei ere adi nago. Edo aire zabalean ibiltzera goazenean, ibilbide eta irteerak egiten ditugunean, eta abar.
Zer tresna erabiltzen dituzue hegaztiak ikusi ahal izateko?
Jon de la Parte Quintas: Prismatikoak erabiltzen ditutu. Soinuak ondo identifikatzen ditudalako ikusten eta entzuten ditut.
Nola erregistratzen duzue informazioa?
Jon de la Parte Quintas: Oraingoz nire artxiboetan gordetzen dut, disko gogorrean. Denborarekin dokumental txiki bat egitea gustatuko litzaidake. Eta zentroko webgunea martxan jartzen denean, hegaztientzako txokoa egin nahi dut.
Nola laguntzen dizue talde profesionalak hegaztiak behatzeko?
Jon de la Parte Quintas: Egia esan, ez dut laguntzarik behar honetarako, ondo egiten dut bakarrik. Zentrotik irteerak antolatu dira Santoñara eta Urdaibaira, besteak beste, argazki eta bideo hauek atera ahal izateko.
📸 Santoñako irteerako argazki albuma esteka honen bidez ikus dezakezu.
Hegazti desberdin asko dago inguruan? Zein da bereziena?
Jon de la Parte Quintas: Hilabete hauetan espezie asko ikusi ahal izan ditut, nire kalkuluen arabera 24 bat. Orain arteko bereziena kamatxoa izan da, zaila baita ikustea, neguan hilabete batzuk baino ezin dira ikusi.
Nola da baliagarria proiektua pertsonen garapenerako?
Derio EAZ: Jonen kasuan, proiektuan parte hartzeak zentroarekin lotura sortzen lagundu zion. Erantzukizun handiz egiten ari den jarduera da, eta gogobetetasun pertsonala ematen dio.